Paróiste is ea Cill Mochriodóg / Kilmacredock i gCo. Chill Dara. Tá an t-ainm caomhnaithe leis in dhá bhaile fearainn sa pharóiste, Cill Mochriodóg Uachtarach agus Íochtarach. Sa bhliain 1837, bhailigh foireann topagrafaíochta na Suirbhéireachta Ordanáis eolas comhaimseartha faoi sheaneaglais a bhí suite i gCill Mochriodóg Uachtarach: ‘In Upp[er] Kilmacredock townland there is a church in ruins which is described in the Namebook as being nowadays used as a cow house. This church gave the name to the parish’ (Litreacha na Suirbhéireachta Ordanáis, Co. Chill Dara). Tá raidhse tagairtí don logainm faoi chaibidil i gcáipéisí Laidine nó Béarla ón séú haois déag agus ón seachtú haois déag, tagairtí ar nós Kylmacredoke (1518c), Kilmacredoke (1552), Kilmacredok (1581), Kilmacredock (1611). Tá sampla ar fáil ón mbliain 1389 den litriú ‘Kylmacrydok’. I bhFéilirí na Naomh Éireannach, ar cumadh na leaganacha is sine díobh atá againn i dtosach an naoú haois, ceiliúrtar naomh darb ainm ‘Mochritoc .i. Critán’ - foirm cheana de Críodán (i litriú an lae inniu) is ea Mochríodóg. Sa tráchtadh a cuireadh le cuid de na féilirí úd i ndeireadh an dara haois déag meastar, maíodh go raibh an naomh ina chónaí ‘for brú Dothra i nUibh Dunchada’ (.i. ar bhruach na Dothra in Uíbh Dhúnchadha). Treabhchas ba ea Uí Dhúnchadha a bhí lonnaithe, de réir theorainneacha an lae inniu, taobh theas den Life i gCo. Bhaile Átha Cliath chomh fada siar le Co. Chill Dara. Cé nach bhfuil Kilmacredock suite cois taobh na Dothra, ar a shon sin ní miste a mheas gur Mochriodóg, leagan d’ainm an naoimh, atá caomhnaithe sa logainm seo.