(the) river meadow of —

Píosa talún cois abhann an ghnáthbhrí le inse inniu, cé gurbh ionann é agus inis tráth. Talamh íseal ag síneadh leis an Life atá sa bhaile ar a dtugtar Inchicore West ar léarscáil na Suirbhéireachta Ordanáis. Ní fios go cinnte céard atá sa dara heilimint. Ón bhfianaise atá againn ar an ainm ó thús an 17ú haois i leith, dhealródh sé gur fuaim ar nós cór atá san eilimint sin ach ní léir cén focal é féin. I gcáipéis ón dara ceathrú den 17ú haois luaitear 'The Steep Shrubby Hill alias Nynescore alias Inchicore'; faightear foirmeacha atá sách gar d'fhoirm Bhéarlaithe an lae inniu tamaillín níos deireanaí san aois chéanna, m.sh. 'Inchicore agus Inchycore' ón mbliain 1654. Tá foirm ón mbliain 1659, 'Inseguore', a thabharfadh le tuiscint go mb'fhéidir gurb é an t-ainm pearsanta Guaire atá sa dara heilimint, ach tá an fhoirm sin eisceachtúil go maith; is ar éigin má tá tacaíocht ar bith dá leithéid de leagan ó na foirmeacha eile i gcáipéisí ón 17ú agus ón 18ú haois.