I dtaca le Kilmilkin de, is gnách Béal Átha na mBreac a thabhairt ar an áit i nGaeilge. Tagann 'Kilmilkin' ón nGaeilge chomh maith dar ndóigh, ach oiread le 'Clonbur' i nDúiche Sheoigheach ar a dtugtar An Fhairche i nGaeilge. Ní léir ón bhfianaise stairiúil, cé acu an raibh an consan a bhí i dtosach an tsiolla dheireanach den logainm seo séimhithe nó neamhshéimhithe .i. Míolchon nó Míolcon; seo roinnt samplaí den logainm: Kelmylcon (bliain 1593), Koylenamikan (1660), Kilnemolochan / Kilnemilchan (1617), Coill Míolach agus Coill Milicín (leaganacha Gaeilge, timpeall 1839). Ainmneacha pearsanta seanbhunaithe iad an dá ainm seo a leanas atá gaolmhar le chéile, Míleac agus Míolchú. Is ionann foirm ghinideach don dá ainm sin, mar atá Míolchon, le 'c' séimhithe. D'fhéadfadh an t-ainmfhocal míleac, a chiallaíonn talamh cois abhann, a bheith taobh thiar den logainm faoi chaibidil leis--cé gur mílic gnáthleagan ginidigh an fhocail sin (Móinteach Mílic m.sh.), tá an fhoirm Míolcon teastaithe chomh maith sa ghinideach i seanteács Gaeilge. D'fhéadfadh ainmfhocal a bheith sa chuid deireanach den logainm chomh maith céanna, mar atá míolchú, focal a chiallaíonn 'greyhound, hunting hound'. Bhí an focal úd baininscneach tráth (ginideach uatha, *na míolchon) agus b'fhéidir Coill na Míolchon a bhaint as cuid de fhianaise an logainm.