the church
giorrúchán < An Chill Bheag “the small church”

In ainneoin nach bhfuil aon iarsmaí seandálaíochta san áit seo (féach www.archaeology.ie), is léir ón áit ina bhfuil an comhartha beag eaglasta ar léarscáil an Down Survey ag freagairt do 1660c ‘Gleabe Land in Killbegg’ BSD gurb ionann é is 1638c ‘cæmiterium de Kilbegge iuxta Tenahensy’ [“reilig Kilbegge in aice Thigh na hInse”]. Tá an baile fearainn beag bídeach seo (7 acra) faoi mar a bheadh oileáinín sa chuid thiar de bf Tigh na hInse (#28682).

Sampla é seo de logainm béarlaithe sa tseandúiche Uí Fhailghe ina bhfuil fianaise dhiongbháilte ar son défhoghair /~kəil/ < cill “church”. (Tá 1837 ‘Kyle grave yard’ in bf An Ráth Dhubh (#25127) i gContae Chill Dara suite díreach lastoir ó dheas de theorainn bharúntacht Uíbh Fhailí Thiar; cf. Ó Crualaoich, Logainmneacha na hÉireann IV (LG) s.n. Kyle (par. Templeshanbo). Is é bf An Chill Bheag/Kylebeg (#54883) in iarthuaisceart Chontae Chill Mhantáin, mar a bhfuil cloch bhalláin agus iarsmaí eaglasta eile le fáil, an sampla is sia ó thuaidh i gCúige Laighean.)