Ní cinnte brí an logainm seo.

Tá an fhianaise luath, m.sh. 1294 ‘Scatheryck’, 1316 ‘Scatheryk’, breá soiléir mar réadú ar scaderc na Meán-Ghaeilge, a raibh an fhuaim /ð/ ag -d- (-dh-) fós ann. Bhí an fhuaim seo imithe as an nGaeilge faoi lár an 14ú haois — mar atá le feiscint in 1351 ‘Skaryk’. (Seanlitriú atá i 1500c ‘Skathryk’.)

Ní léir cad atá i gceist le scadharc (< scáth + derc “mirror”, www.dil.ie) mar logainm anseo, áfach. Tá samplaí eile i Loch Garman (#53623) agus sa Mhí (#38271), agus tá cnoic le fáil sna háiteanna seo go léir — d’fhéadfadh sé mar sin gur bhrí éigin cosúil le ‘radharc’ a bhí leis (féach Ó Crualaoich, Logainmneacha na hÉireann IV: Ainmneacha na mbailte fearainn, Co. Loch Garman s.n. Scark).