Is iad seo a leanas na tagairtí neamhspleácha:

1302 ‘Yoyngiston’ CJR
1518 ‘Yongiston’, ‘Yongeston’ Kild. Rent.
1540 ‘Yongston’ Crown Surv.
1544 ‘Yongeston’ F
1550 ‘Balleyonge’ = 1551 ‘Balleyong’ = 1566 ‘Ballyonge’ = 1597 ‘Balliough’ F = 1612 ‘Balliough’ CPR
1554 ‘Yongeston’ F
1609 ‘Balleyonge’ CPR (iontráil dar dáta 1621 ach ag tagairt do ‘deed dated 20 May 7th’)
1654 ‘Youngstowne’ CS
1659 ‘Youngs towne’ Cen.

Tá an pátrún ceannann céanna le braistint i gcás bf Baile an Chrócaigh (#25226) agus bf Baile an Sprotaigh (#24916) sa cheantar seo freisin .i. an logainm Gaeilge le sonrú sna gníomhais ghallda chéanna seo (1550, 1551, 1566, 1597, 1612) ach gan é le fáil in aon áit eile roimhe sin nó ina dhiaidh.

Is beag an seans go raibh leithéid *Baile (an t)Siún(aigh) (< le Jeune) ar an áit seo sa Ghaeilge riamh. Ba dheacair é a réiteach le 1550 ‘Balleyonge’, agus ba dheacair a áiteamh ach an oiread go ndéanfaí dearmhad ar sheanleagan mar sin gur cumadh aistriúchán nua Youngstown > Baile *Young c. 1500 nuair a bhí an Ghaeilge ag fáil an lámh in uachtar. Measaimid dá bharr sin gurb amhlaidh gur réadú cuíosach cruinn ar an logainm Gaeilge atá i 1550 ‘Balleyonge’.

Féach mar sin 1314 ‘Thomas le Yonge’ [Baile Thancaird, CD 38] CJR III 325 agus samplaí eile sa Pháil ar nós 1308 ‘John Yonge’ [BÁC] CJR III 30, 1314 ‘Wy… le Yong’ [TÁ] CJR III 320. Samplaí iadsan ar cinnte nach aistriúchán é ‘young’ ar an mbuafhocal juvenis, jeune, srl., sa bhuntéacs (murab ionann is 1295 ‘Andr. the young’ [CC] CJR I 8, 1299 ‘Will. the young, John the young’ [Lú] CJR I 277, 1314 ‘Simon Young (juvenis)’ CJR III 325 san fhoinse céanna).

Measaimid gur dóichí go gcuireann 1550 ‘Balleyonge’, 1609 ‘Balleyonge’ (le y- /j-/ sa cháilitheoir) leithéid *Baile Ghiong(a) < *Baile an Ghiongaigh */ˌbɑl′ɪˈjoŋ(g)ə/ in iúl. Thuairimeoimis *An Giongach < *(de) G(h)ionga < le Yonge < ȝung an Mheán-Bhéarla. Is é sin le rá, gaelú ar leagan Angla-Normannach de shloinne atá bunaithe ar aidiacht Mheán-Bhéarla, díreach ar aon dul le de Bláca < le Blake < blac MBrl., de Faoite < le Whyte < hwīt MBrl., de Hóra < le Hore < hār MBrl. — murab ionann is de Brún < le Brun, de Paor < le Poer agus de Siún < le Jeune féin atá bunaithe ar aidiachtaí Normannaise. Is cosúil mar sin go bhfuil dul amú ar de Bhulbh an sloinne seo (le) Yonge a cheangal le de Siún < le Jeune scun scan (SGG).

Bheadh cuma neamhghnách ar *(de) G(h)ionga mar leagan gaelaithe de (le) Yonge go cinnte. Ach sin é go díreach an réadú a mbeifí ag súil leis ar ȝung MBrl., ar mhúnla Gíomán (sloinne), gíománach (ainmfhocal) (1542 ‘giomanach’ ALC) < Yeoman < ȝoman MBrl. (cf. 1551 ‘Graigyeman’ COD (#48458) TÁ 49, 1618 ‘Ballingimanigemore’ CPR (#10994) Co 112).

(Féach ‘Youngach’ mar a bheadh gnáthshloinne gaelaithe */joŋ(g)əx/ sa téacs seo a scríobhadh in Oirialla in 1714 ‘…mac Sheóirse Táth do chréachtghoin mílte. … Bráthair gach Táth dá bhfeabhas sa chrích é, / bráthair na mBlácach ’n am cath’ nach gclaonadh, / bráthair na mBealógach ó Dhubhlíce, / bráthair na bhFléamannach éachtach ríthiúil, / bráthair gan gó Mhic Mhathamhna shaoir é, / bráthair na Youngach gan mhearú ina ngníomha … … is Mailí Young an ríoghan aobha’ i gcló sa Clogher Record (1968) 621. Cf. freisin 1836 ‘Yores … Na Yoraigh … Padraic Yore (Patrick Yore)’ LSO (Lú) 172 agus ‘Na Bhárdaigh … An Bhárdach … Mac a’Bhaird’ ibid. 85.)

Bhí an Ghaeilge ábalta ar an bhfoghar seo y- /j/ a láimhseáil gan dabht ach ceist cháiréiseach is ea conas is fearr é a thaispeáint sa litriú oifigiúil den logainm seo idir chamáin. Measaimid gur fearr *Baile an Ghiongaigh/*Baile Ghionga. Chomh maith le gíománach < yeoman thuas, cf. samplaí eile de g-caol < y- /j-/ tosaigh ar nós giosta < yeast, geolta < yawl, giúmar < humour (/ˈjuːmər/).